ព័រទុយហ្គាល់៖ លោក Nuno Espirito Santo ដែលទើបដឹកនាំ Tottenham Hotspurs ឈ្នះក្រុមជើងឯក Premier League ២០២១ Manchester City កាលពីចុងសប្តាហ៍កន្លងទៅ បែរជាមកភ្លាត់ចាញ់ក្រុមមកពីលីគកំពូលព័រទុយហ្គាល់ Pacos de Ferreira យ៉ាងគួរឱ្យភ្ញាក់ផ្អើល ក្នុងការប្រកួតជើងទី១ ពាន UEFA Europa Conference League នៅយប់មិញនេះ។

ការប្រកួតនៅកីឡដ្ឋាន Mata Real កាលពីយប់មិញនេះ ក្រុមរបស់លោក Nuno បានផ្លាស់ប្តូរសមាសភាព ១១នាក់ដំបូងទាំងអស់តែម្តង ដោយភាគច្រើនគឺជាការបង្ហាញខ្លួនរបស់យុវជន ព្រមទាំងកីឡាករទើបនាំចូលដូចជា​ Pierluigi Gollini, Cristian Romero និង Bryan Gil ជាដើម។ ក្រុមម្ចាស់ផ្ទះ Pacos de Ferreira យប់មិញនេះ រកបានមួយគ្រាប់មុនមកកាន់ទឹកដីអង់គ្លេសវិញ ដោយកីឡាករយុវជនប្រេស៊ីល Lucas Silva នៅនាទីទី៤៥។

Tottenham Hotspurs ដែលទើបយកបាន ៣ពិន្ទុពី Manchester City ក្តៅៗនោះ នឹងត្រូវត្រឡប់មកកាន់ទឹកដីអង់គ្លេសវិញ ដោយបន្តធ្វើដំណើរប្រកួតក្រៅដីទៅកាន់កីឡដ្ឋាន Molineux Stadium ជួបជាមួយក្រុម Wolves ដែលជាអតីតក្រុមចាស់របស់គ្រូបង្វឹក Nuno ផ្ទាល់តែម្តង នៅថ្ងៃអាទិត្យ ទី២២ ខែសីហានេះ វេលាម៉ោង ៨យប់។ ដោយឡែក សម្រាប់ការប្រកួតជើងទី២ Spurs នឹងបើកទ្វារកីឡដ្ឋានតម្លៃជាង ១ពាន់លានផោនរបស់ខ្លួន ទទួលស្វាគមន៍ Pacos de Ferreira នាថ្ងៃទី២៦ ខែសីហាខាងមុខនេះ៕